Türkmenistan BMG-niň howandarlygynda Merkezi Aziýa döwletlerinde suwdan peýdalanmak meseleleri boýunça sebit geňeşini döretmek başlangyjy bilen çykyş etdi. Bu baradaky teklip Türkmenistanyň Prezidenti Serdar Berdimuhamedow Astanada geçirilýän Sebit ekologiýa sammitiniň plenar mejlisinde eden çykyşynda öňe sürüldi.

«Türkmenistan BMG-niň howandarlygynda Merkezi Aziýa döwletlerinde suwdan peýdalanmak meseleleri boýunça sebit geňeşini döretmek başlangyjy bilen çykyş etdi, ol suw çözgüdinde tagallalary utgaşdyryjy netijeli düzüm bolup bilerdi» diýip, döwlet Baştutany aýtdy.

Türkmenistanyň Prezidenti serhetüsti suw serişdeleriniň rejeli we adalatly ulanylmagy meseleleriniň aýratyn üns talap edýändigini nygtady.

«Türkmenistanyň resmi pozisiýasy bu ýerde örän aýdyň we açykdyr. Biz serhetüsti derýalarda we suw akabalarynda suw meseleleriniň aşakdaky üç sany esasy ýörelgäniň esasynda çözülmeginiň tarapdary bolup çykyş edýäris» diýip, Serdar Berdimuhamedow belledi.

Onuň sözlerine görä, gürrüň suw meseleleri boýunça binýatlaýyn konwensiýalaryň we beýleki halkara paktlaryň berk berjaý edilmegi, serhetüsti derýalaryň ugrunda ýerleşýän ähli döwletleriň bähbitleriniň deň derejede hasaba alynmagy, şeýle hem halkara guramalaryň, ilkinji nobatda, BMG-niň giňden gatnaşmagy barada barýar.

Astanadaky Sebit ekologiýa sammiti BMG-niň howandarlygynda 22-nji aprelden 24-nji aprel aralygynda geçirilýär. Oňa birnäçe müň wekil, şol sanda 100-e golaý döwletleriň we halkara guramalaryň ýokary wezipeli wekilleri gatnaşýarlar. Şeýle-de sammitiň çäklerinde Merkezi Aziýa ýurtlarynyň Prezidentleriniň gatnaşmagynda Araly halas etmegiň halkara gaznasyny esaslandyryjy ýurtlarynyň Geňeşiniň mejlisini geçirmek meýilleşdirilýär.